البارحه جاني من الحب مرسال
من عقب مابيني وبينه خصيمه
واناترى في الحب ماني بفعال
ولابعدولع بقلبي هشيمه
ولابعد غنيت في ساعة وصال
ولابعدذقت الغرام وجحيمه
ولاجرى دمعي على الخدهمال
ولابعدجربت مر الهزيمه
حتى وردني تالي الليل جوال
واناعلى شاهي وبسكوت ديمه
الرقم بايخ لكن الصوت قتال
كنه مثل صوت المذيعه حليمه
قالت مساء الخيرياطيب الفال
قلت ارحبي ترحيبه مستديمه
بالعود والصفري ودله وفنجان
واجبك يابنت الأصول الكريمه
ردت بضحكه ثم قالت ويش الحال؟
قلت اشهدان الحال عقبك سقيمه
قالت وهي تضحك بعدمثل الاطفال
وانابعد كني بدونك يتيمه
من يوم ماقالتها تزلزلت زلزال
من فجعتي كني مسوي جريمه
قلت ارفعي صوتك ترى مابه ارسال
كذاب لكن المصيبه عظيمه
قالت اقول اسمع ترى هرجك طال
ممكن تصاحبني تراني وسيمه
واسمي اول حروفه الدال
لاكن يسموني البنات الزعيمه
صحيح احب الفخفخه واعشق المال
لكن تراني طاهره مستقيمه
ماعندي مغازل ولا لعب جهال
ماعندي الا بالشرف والحشيمه
بس بصراحه قلبي لشوفتك مال
واصبحت وحدك جالس في صميمه
فكربعقلك واترك القيل والقال
واحذرتطيع اهل العقول العقيمه
وارسل علي الحين خمسمية ريال
اشحن بها جوال اختي غنيمه
اوطقم غالي فيه خاتم وسلسال
اروح به في عرس اوعزيمه
قلت الحقيقه مانيب رجل اعمال
ولاني بتاجر والموارد عديمه
اناالصراحه شبه عطال بطال
وعلاقتي بالفقر جداحميمه
والراتب الله يرحم الحال مازال
محدودوالمصروف ربي عليمه
والدين بالالاف والبنك شغال
ياكل فلوسي بالربا والظليمه
والسوق طايح والغلا ضيق البال
والموت والله صار اكبر غنيمه
قالت تحمل بس والحمل ينشال
خلك شديد الباس صلب العزيمه
ياخي تصرف جعلك تصيرنشال
اهم شيئ ان النوايا سليمه
لابدتفهمني على كل الاحوال
مادمت من اهل العقول الفهيمه
قلت اي والله فاهم الي على البال
لكن ترى هذي عليناقديمه
يابنت هذي صايره اليوم موال
للي تبي تلعب على ابن اللئيمه
يابنت كم من جاهله دمعهاسال
من عقب ماجت العواقب وخيمه
والبنت لا اقفى عرضها بين الانذال
والله مابقى لها اي قيمه
قالت تبي والا فخلك على جال
مهو بناقصني نصايح حكيمه
عزالله انك للاسف ماانت رجال
وانك قليل الذوق مافيك شيمه
يالعنبواللي مايسطرك بنعال
حتى يعلمك الغزل يابهيمه
تفوا عليك وصكت الخط في الحال
مدري(تفوا)هي مدح والا شتيمه
وتقبلوا تحياتي
ماادري من القايل بس اعجبتني وان شاءالله تعجبكم
ونرد لكي بهذه القصيده وياريت تتقبليها لانها قريبه من نوع هذه القصيده
سبع ساعات اسولف واتكلم واستخف دمي
وهي تسمعني وتضحك ومبسوطه على الأخر
::
سبع ساعات اعلمها عن احزاني وعن همي
واسولف عن حكايا الطفل كان وصار هالشاعر
::
سبع ساعات تتساقط حروف الصدق من فمّي
على صحرا مسامعها سحاب العشق متناثر
::
سبع ساعات وتحلف لي براس العشق وتسمي
تقول انت الوحيد اللي ملكني حبك الساحر
::
سبع ساعات ونادتني بأسمه ما هو بأسمي
تناديني فهد واسمي انا ياللاسف جابر
::
تشنج كل شيٍ كان حولي ومسمعي يدمي
ركز خنجر فهد في مسمعي من صوتها الخادر
::
تخدّر فكري وجسمي وذاب بداخلي عظمي
وصرت اسمع صدى صوتٍ يردد غلطة الشاطر
::
يردد غلطة الشاطر بعشرة واقعي وحلمي
وترددها زوايا غرفتي والواقع الغادر
::
كثير اصوات شقت جلدي اللي يحتضن عظمي
وصراخ الباب والدولاب والشباك والساتر
::
وونات القلم والدفتر اللي يلتفت يمي
وخايف وش ابي اكتب بوسطه من هنا لـ باكر
::
وكانت ساكته وصوت النفس من خشمها و خشمي
ربع ساعه وبحة صوت قالت: خير وش صاير
::
وطرا في بالي عبدالله وخالد واحمد ونشمي
ولآخرهم فهد تسعه وانا مدموغه العاشر
::
وقلت ابداً مغير الخير ولكن امسحي رقمي
اكيد انه فهد جالس سبع ساعات وهو ناطر
::
وقالت لي: رجاءً او اقولك.. طير ياعمي
مسوي حضرتك في هالزمان العاشق الطاهر
::
وقالت لي: اقول! وقلت: انا بقول وذا علمي
عجب هالناس وش هالناس تخطي وبالخطى تكابر
::
انا يابنت بنثر لك حياتي واجمعي لمّي
بعضه بنثره في مسمعك هالحين ومن خاطر
::
ترا عمري انا تسعه وعشرين وكذا رسمي
ولكن عشت ايامي دبلها مقبل وعابر
::
اصيل وكل اصيلٍ مايبي مدحي ولا ذمي
وسبع انعام في هالناس اخص الحامد الشاكر
::
انا من نجد وربعي هم عتيبه وخالي الدحمي
وبرقا لحمي ودمي وانا من روق ومع ناصر
::
انا جابر ولد هايف وسلم الطيب هو سلمي
ابو الي مربيني على الجزلات واتفاخر
::
انا راعي مجاهيمٍ يشع بفخذها وسمي
وراعي خيل وراعي بير وبيتٍ مبغضه كافر
::
على الرمضى ابت رجلي بأرضٍ عاشقه ضمي
وشمسٍ تشرق وتوقف على راسي وانا صابر
::
عرق وجهي يصب وامسحه بشماغي وكمي
وألد عيوني عن ناسٍ سرقني يمها الناظر
::
وانا شاعر ولو اكتب عجز كل فكر في نظمي
ولاني بالغرور احكي ولكن واثق وقادر
::
وانا رجال هاوي للقمم ويقودني عزمي
وابي ارقى على راس الجبل وانتي مع الحادر
::
عرفتي ليه انا طاهر؟ لانك همي وغمي
ولان الدنيا في عيني جبل نرقاه ونغامر
::
يابنت الناس شفتي كيف بليّا سلاح مانرمي
ولانوقف بوجه البندق المليان ونخاطر
::
خلقنا الله بشر بعقول وذا واقع وذا وهمي
وكلٍ يتبع مراده وفينا رابح وخاسر
::
وقالت لي فمان الله شعلت النار في جسمي
فمان الله يالطاهر ومثلك قله ونادر
::
ورحت آخذ كتاب الله واحلف بالكتاب:" امي
لو ان اسمي فهد بالله ماكان احلى من جابر
قصه مكالمه في قصيده 
![الصورة الرمزية [َِkَِaَِrَِsَِtَِalَِh]](http://bnat.bo7.net/avatars/%5B%D9%90%D9%8Ek%D9%90%D9%8Ea%D9%90%D9%8Er%D9%90%D9%8Es%D9%90%D9%8Et%D9%90%D9%8Eal%D9%90%D9%8Eh%5D.gif?dateline=1232225755)
العرض العادي
